2 Raja-raja 6

Den pissan ma’kadami tu passikola nabi lako Elisa nakua: Tiromi tu inan dio tingayomi tu kinii torro, tarru’ si’pi’kan.

Elorangkan male lako Yordan, angki pada unnala lentong simisa’, kipabendan banua inde to, la kinii torro’. Ma’kadami nakua: Malemokomi.

Ma’kadami tu misa’ nakua: ke ma’dinni mimale sola taummi. Mebalimi nakua: Kumalemora ussolankomi.

Malemi ussolanni. Iatonna rampomo sola nasangi lako Yordan, nalellengmi tu ba’tu pirang-pirang lolo kayu.

Denmi misa’ dio mai tau iato, marassan ullelleng misa’ kayu, anna tobang tu mata uasena rokko uai; melallakmi nakua: O puangku, iatu uase iato kuindan!

Ma’kadami tu taunNa Puang Matua nakua: Umbara nanii tobang? Nadullumi tu inan nanii, anna lontokki Elisa tu kayu sanglontok, nabuangi inde to lako, anna paunnayangi sule tu mata uase.

Nakuami: Alami. Nadondongammi tu limanna, anna alai.

Iatu datu Aram sirarimo to Israel. Sipa’kadami datu to Aram tu mintu’ to mase’ponna, nakua: Dio anu la kupannii tu inan surodadungku.

Nasuami taunNa Puang Matua tu pesua lao umparampoi lako datunna Israel, nakua: Katangkinni tu kalemi lendu’ inde to dio, belanna iatu to Aram mengkalaomo dio.

Nasuami datu Israel tu surodadu lako tu inan napokadanni taunNa Puang Matua sia napa’pakilalan, naurunganni ungkatangkinni kalena, sia tangia pissan ba’tu penduan mannamo susito.

Belanna dionato napotiangka’mi penaanna datu Aram, natambaimi tu mintu’ to mase’ponna sia ma’kada lako nakua: Tae’raka mila umpokadanna’, mindantara sikangkolo’ datu Israel?

Nakuami tu misa’ to mase’ponna: Tae’ nasusito, puangku datu, sangadinna Elisa nabi dio Israel umpokadanni datu Israel tu mintu’ kada mipokada, moi nalan inan kamammarammi minii umpokadai.

Ma’kadami tu datu nakua: Malekomi mitiroi, ba’tu umba nanii; kumane ussua tau untingkanni. Naparampomi tau lako nakua: Manassa dio Dotan.

Nasuami datu umbaai lako tu mai ba’tu pira-pira darang sia kareta sia surodadu kamban. Saemi lako tu tau iato mai tonna bongi, anna patama limbui tu kota.

Iatonna melambi’ millikmi tu to ungkamayai taunNa Puang Matua, anna sun lako salian, mangngami, belanna napatama limbu surodadu tu kota iato, sola darang sia kareta. Ma’kadami tinde taunna lako nakua: O puangku, apamora la tapogau’?

Apa ma’kada nakua: Da mumataku’, belanna iatu urrondongki’ mandu buda na iatu to nasolan tau iato mai.

Massambayangmi tu Elisa, nakua: O PUANG, pami’sokki tu matanna anna tiroi! Napami’sokmi PUANG tu matanna to ma’kamaya anna tiroi. Aa! naponnoi darang api tu tanete sia kareta api untikui Elisa.

Iatonna solo’mo tu tau iato mai narampo lako Elisa, massambayangmi lako PUANG, nakua: Pamaraunni tu matanna tau iato mai. Napamaraunmi Puang, susitu kadanna Elisa.

Nakuami tu Elisa lako tau iato mai: Tangia lalan te sia tangia kota angku solangkomi lako tu to midaka’. Nasolammi tu tau iato mai lako Samaria.

Iatonna rampomo tu tau iato mai lako Samaria, pakalan massambayangmi tu Elisa nakua: O PUANG, pamilikki matanna te tau iate mai, anna pakita. Napamillikmi PUANG tu matanna tau iato mai, ta’kala natiroi. Mangngami belanna lanmo tangnga kota Samaria.

Iatonna tiromi, ma’kadami tu datu to Israel lako Elisa, nakua: E ambe’ ma’dinraka la kupatei te tau iate mai?

Apa mebali nakua: Da mipatei tu tau iato mai. Mipateiraka tu tau mirampa pa’dang sia panami? Palennaranni roti, sia uai, anna kandei sia nairu’i, namane sule lako puangna.

Napasakkarammi datu Israel misa’ pa’maruasan kapua tu tau iato mai; sia iatonna mangka kumande sia mangiru’, naelorammi male tu tau iato mai sule lako puangna. Mangkanna to, tae’ bangmora sae tu tuntunan to Aram mangrampa dio tondok to Israel.

Mangkato naarakmi Benhadad, datu Aram tu mintu’ surodadunna, anna ke’de’ male umpatama limbu Samaria.

Narampoimi karorian pannang tu Samaria, belanna masai tongan napatama limbu tau iato mai tu kota iato, naurungan misa’ ulu keledai karua pulona sikele’ allinna, na sangtepo ka’ tai bu’ku’ lima sikele’.

Iatonna lendu’ tu datu Israel dao benteng tembo’ metambami misa’ baine mengkamoya lako nakua: O puangku datu, tunduina’!

Nakuami tu datu: Iake tae’i Natunduiko PUANG, naumbara la kunii untunduiko? Dioraka mai panglulluran, ba’tu dioraka mai pa’parran anggoro’?

Sia nakutanaipa datu nakua: Apara tu kamasussammu? Mebalimi nakua: Iate baine ma’kada lako kaleku nakua: Pa’benganni tu anakmu anta kandei allo iate, namasiangopa tu anakku tamaneo ungkandei.

Iamoto angki tollo’i tu anakku, angki kandei. Apa masiang pole’to kukuammi lako: Totemo pa’bengammi tu anakmu anta kandei, apa male nabumi tu anakna.

Iatonna rangimi datu tu mintu’ kadanna te baine, naserek-serekmi tu pakeanna; na iatonna lendu’ dao benteng tembo’, natiromi to buda kumua iatu datu ma’pakean karoro’mo.

Sia ma’kada tu datu nakua: Nasanggangimora’ Puang Matua sia la narangnganni pole’pa, ke tae’i na allo ia bangsiamote dinii umpasisarakki tu ulunna Elisa, anakna Safat, dio mai kalena.

Unno’ko’mi tu Elisa lan banuanna sola tu mai pekaamberan. Nasuami datu dolo tu pesua. Iatonna tae’pa narampo tu pesua iato lako Elisa, nakuami Elisa lako pekaamberan: Tae’raka mitiroi tu anak to papatean iate ussua tau la unta’takki ulungku? La mikanandai, iake rampomi pesua iato, la mitutu’i ba’ba ammi pasualei ba’ba tassu’. Tang la tumanuturika tu pentengkana puangna dio boko’na?

Marassan bangsia sipa’kada-kada tau iato mai, ta’kala saemi tu pesua lako kalena. Nakuami tu datu: Manassa mandu tongan tu kamandasan naparampoangki’ PUANG! Apara gai’ku urrannuampa PUANG?